By Nitin Mer 
પ્રાદેશિક કમિશનર નગરપાલિકાઓ, ભાવનગર ઝોન ધવલ પંડ્યાના માર્ગદર્શન હેઠળ મહુવા નગરપાલિકા તથા નગરપ્રાથમિક શિક્ષણ સમિતિના ઉપક્રમથી શહેરી વિકાસ વર્ષની ઉજવણી અંતર્ગત મહુવા નગરપાલિકાની શાળા એમ.એસ.બી.-૫ અને શાળા એમ.એસ.બી.-૧૫ના ધોરણ ૬ થી ૮ ના વિદ્યાર્થીઓ અને સ્ટાફ મળી કુલ ૪૧૮ તાલીમાર્થીઓ માટે ફાયર સેફ્ટી અંગેની તાલીમનો કાર્યક્રમ યોજાયો હતો.
વર્ષ ૨૦૨૫ને ગુજરાત સરકાર દ્વારા શહેરી વિકાસ વર્ષ તરીકે ઉજવવાનું નક્કી કરવામાં આવેલ છે. જેના Pillar-3 Good Governanceમાં અધિકારીઓ/કર્મચારીઓને જરૂરી તાલીમ આપવા ઉપર વિશેષ ભાર મુકાયો છે. કોઈપણ કુદરતી આફત કે માનવ સર્જીત દુર્ધટનાથી બચવા અને તેનો સામનો કરવા માટે શાળાના વિદ્યાર્થીઓ અને શાળાના કર્મચારીઓને સુસજ્જ કરવા આવશ્યક હોય છે. જે અન્વયે પ્રાદેશિક કમિશનર, નગરપાલિકાઓ ભાવનગરના માર્ગદર્શન હેઠળ મહુવા જિલ્લાની મહુવા નગરપાલિકાની નગરપ્રાથમિક શિક્ષણ સમિતિની ૧૭ શાળાઓ માટે ફાયર સેફ્ટી અંગેની તાલીમનું આયોજન કરવામાં આવેલ છે.
તે પૈકી મહુવા નગરપાલિકાની શાળા એમ.એસ.બી.-૫ અને એમ.એસ.બી.૧૫ના સંયુક્ત કેમ્પસ ખાતે શાળાના આચાર્યના અધ્યક્ષસ્થાને ફાયર સેફ્ટી જેવી મહત્વની તાલીમ ધોરણ ૬ થી ૮ના વિદ્યાર્થીઓ અને શાળાના તમામ કર્મચારીઓને આપવામાં આવી હતી. આ તાલીમનો લાભ ૪૦૭ વિદ્યાર્થીઓ તથા શાળાના ૧૧ કર્મચારીઓ મળી કુલ ૪૧૮ તાલીમાર્થીઓએ લીધો હતો.
તળાજા મોડેલ ફાયર સ્ટેશનના ફાયર ઓફિસર ચિરાગભાઈ વાળા અને તેમની ટીમ દ્વારા ફાયર સેફ્ટી અંગેની થિયરી અને પ્રેક્ટિકલ ડિમોન્સ્ટ્રેશન દ્વારા સમજ આપી. જેમાં ફાયર સેફ્ટી અંતર્ગત આગના વિવિધ પ્રકારો અને તેને કાબુમાં લેવા માટે ઉપયોગી વિવિધ પદ્ધત્તિઓ તથા અગ્નિશમન સાધનોનાં ઉપયોગ વિશે સમજ આપવામાં આવી અને સાધનો/ઉપકરણોનું નિદર્શન યોજવામાં આવ્યું હતું.
વડાપ્રધાન શ્રી નરેન્દ્રભાઈ મોદીએ પોતાના મુખ્યમંત્રી તરીકેના કાર્યકાળ દરમિયાન ૨૦૦૫ને પહેલી વાર શહેરી વિકાસ વર્ષ તરીકે ઉજવ્યો હતો. ત્યારથી શરૂ થયેલી રાજ્યની શહેરી વિકાસ યાત્રાને આજે ૨૦ વર્ષ પૂરા થઈ ચુક્યા છે. જેના ઉપક્રમે ગુજરાત સરકાર, વર્ષ ૨૦૨૫ ને ‘શહેરી વિકાસ વર્ષ’ તરીકે ઉજવી રહી છે, ત્યારે શહેરી વિસ્તારોને વધુ સુખ-સુવિધા સભર બને તેમજ નાગરિકો ‘Earning Well, Living Well’ નો ધ્યેય સાકાર કરી શકે તે માટે સરકારે વિશેષ આયોજન કર્યું છે. આ માટે ગુજરાત સરકાર દ્વારા સ્વર્ણિમ જયંતિ મુખ્યમંત્રી શહેરી વિકાસ યોજના, અમૃત ૨.૦ યોજના, ૧૫મું નાણાપંચ ઉપરાંત આઇકોનિક રોડ અને સ્વચ્છતા અને અન્ય બાબતો માટે ગત વર્ષ કરતા ૪૦% વધુ બજેટ ફાળવવામાં આવેલ છે.
